هي الرجولة إهدار الحق ؟!

الفجر ..... م. المالكى

مساء الخير .. من غير مقدمات .. انا معترضة على إقتراح إلغاء قانون الخلع على الرغم من إستقراري في حياتي الزوجية .. انا شايفة ان الموضوع ده هيحرم ستات كتير من الخلاص من مشاكل بيتعرضو لها ممكن تتسبب في جريمة أكبر يبقى ليه التعسف ؟

مش فاهمة الفكرة ايه من ده .. يعني اكيد الخلع نفسه مش حرام ولا بدعة وإلا كانت الدنيا كانت هتتقلب ساعة ما نزل وكان كل مشايخ الأزهر اتكلموا .. إزاي نساهم في زيادة المشاكل الإجتماعية بإيقاف قانون أنقذ كتير من الأسر كان ممكن يوصل بيهم الحال إلى أسوأ من الطلاق في حد ذاته ! .. يا جماعة الطلاق وهد البيوت مش سهل حتى على الست المتضررة يبقى ليه متخيلين ان الست اللي بترفع قضية خلع ست هوجاء ومتخلفة وبتفش غلها وخلاص ؟ أكيد لا طبعا .. في كل الأحوال الست المتضررة كانت بتمشي في إجراءات الطلاق بالطريقة العادية لكن الفرق ان المدة اطول لما القاضي يقرر الطلاق يعني النتيجة واحدة .. ده معناه ان المعترضين على الخلع معترضين عشان نزعة الرجولة وان ازاي هية اللي تطلب مش انا اللي اطلق لواحدي ..

بيتهيألي ان الموضوع مش اكتر من نعرة رجالة ملهاش لازمة .. بعدين ليه محدش فكر في الراجل اللي يفضل يطلع عين مراته عشان في الآخر هية اللي تطلب الطلاق وتبريه ؟ !!! .. هوة دة حق ربنا ؟ انا شخصيا مفيش قصة طلاق سمعت عنها إلا إذا كانت بالمنظر ده والراجل كل همة يطلق بس على الإبراء وناسي خالص حق ربنا مش مهم عنده تتفلق الست بالعيال وتولع الدنيا المهم هوة ينبسط .

والبهوات اللي معترضين على الخلع ليه ماكانوش بيعترضوا على إهدار الحق واللي همة متأكدين إنه بيحصل فعلا من كتير من الرجالة .. حسبنا الله ونعم الوكيل , ايه القرف اللي احنا وصلناله ده يعني الراجل لما يحب يطلق ده حلو انما الست اللي طالع عينها لأ .... نقيدها ونشارك في ظلمها اكتر عشان بالطريقة دي بس هنبقى رجالة قال يعني الرجولة متمثلة في إهدار حقوق البشر أو متمثلة في كلمة مين اللي تمشي بصرف النظر مين صح ومين غلط ….

إتقوا الله بقى الواحد اتخنق حد يطلع يتكلم في الهم اللي احنا فيه ده .. احنا اتحولنا لمجتمع عيان وبهتان وبيحتضر خلاص .





التعليقات
التعليقات

إضافة تعليق

التعليقات تحتاج لموافقة صاحب المدونة لنشرها.

البحث